Formada pola parroquia de Santa María de Queimadelos, integrouse en séculos pasados na Xurisdicción de Sobroso con señorío do marqués de Sobroso e conde de Salvaterra, e pertence con posterioridade ó concello de Mondariz.

É unha pequena parroquia rural, cunha superficie total de 2,12 Km2, na que residen 155 habitantes, distribuídos nos dous únicos lugares de Aqueleido e Armada.

Ven funcionando con regularidade dende a súa constitución como Entidade Local Menor o 21 de febreiro de 1935.

Conta con edificio propio para as dependencias da Entidade, construído entre 1963 e 1966. A maior parte dos seus ingresos proceden da xestión dos montes de Peralta e Portela.

A documentación consérvase no edificio da propia Entidade Local Menor.

Rematado o proceso de organización do fondo documental no ano 1996 ocupaba un total de seis metros lineais, debidamente disposto nas condicións axeitadas para a súa futura conservación.

Os traballos de organización e descrición documental foron desenvoltos por José Luis Castro Carpintero, Lourdes Pérez-Santamarina Feijóo, Iñaki Varela Pérez e Jacobo Domínguez Pedreira.

O arquivo desta Entidade conta con cincuenta e catro unidades de instalación, que supoñen a penas seis metros lineais. Conservan documentación dende a súa creación no ano 1935 ata a actualidade.

Poden consultarse a totalidade dos libros de actas da Xunta Veciñal correspondente ó período que vai de 1935 ata a actualidade. Outra documentación especialmente reseñable serían os expedientes dos aproveitamentos de madeiras do período comprendido entre 1950 e 1998 e a documentación presupostaria dende 1951, que supón o 92% do total do fondo documental.