A Área de Comercio da Deputación de Pontevedra creouse no ano 2008, dentro do Servizo de Desenvolvemento Local e Fondos Comunitarios, coa vontade de modernizar e darlle continuidade ó modelo de pequeno comercio característico dun sistema de proximidade.
O traballo deste departamento ten como base o Plan director de comercio (2009-2012). Este documento redactouse conxuntamente con todos os representantes do sector, constitúe a folla de ruta da Área de Comercio e susténtase nas seguintes liñas de acción, que anualmente se materializan en diferentes actividades:
- Apoiar a creación de centros comerciais abertos, consolidar os existentes e crear novos espazos nas cabeceiras de comarca. Apoiar o movemento asociativo comercial de base. Desenvolver plans de actuacións urbanísticos e de equipamento comercial de apoio ós centros comerciais abertos (CCA).
- Formar e cualificar o sector comercial e, sobre todo, profesionalizar o movemento asociativo e dos xestores dos centros comerciais urbanos.
- Colaborar cos concellos para crear equipos técnicos e servizos integrais de apoio ó sector comercial.
- Valorar, rehabilitar e converter en peonís os centros urbanos.
Non cómpre esquecer que o modelo de negocio do pequeno comercio é un elemento estratéxico cunha incidencia directa na calidade de vida das persoas, na posta en valor do patrimonio arquitectónico e urbanístico das vilas, no seu desenvolvemento e que é un apoio fundamental para o sector turístico.
Por estes motivos a Deputación de Pontevedra quere tenderlle a man contribuíndo a potenciar os seus valores de proximidade, atención persoal, flexibilidade e capacidade de adaptación, mantendo unha canle de comunicación permanente co sector co fin de garantir que o pequeno comercio manteña o seu protagonismo na vida social e económica da nosa provincia porque….O COMERCIO FAI CIDADE E FAI PROVINCIA.
Bases do Plan a túa medida 2011
Convocatoria de 22 bolsas de colaboración para as asociacións de comerciantes da provincia de Pontevedra
|