A documentación
Rematadas as sucesivas actuacións de organización, incorporacións e descrición dos fondos documentais conservados no arquivo municipal inventariáronse un total de 4.649 unidades de instalación, con testemuños documentais que presentan unhas datas extremas do período interanual desde 1818 ata a actualidade.
A maior parte dos fondos documentais corresponden ó século vinte con notorias perdas, sendo apenas douscentos os expedientes conservados do século dezanove, especialmente de quintas, contribución rústica e urbana e algúns testemuños de patrimonio e obras municipais e das xuntas locais de Ensino e Sanidade.
Tamén sobresae a perda de libros de actas, soamente conservadas dende 1903, co que se carece desta imprescindible fonte de información sobre a vida local no século dezanove, especialmente no referido á realidade do Concello de Meira. En todo caso, consérvase en bo estado un elevado volume documental.
Aquela documentación referida ó control e xestión presupostarios, dende 1904, con continuidade, ós impostos, a máis abundante, xunto coa derivada da execución das obras municipais e do control sobre as que realizan os particulares.
Este conxunto documental, hoxe correctamente disposto para o seu uso e manexo, dispón dunha completa gama de instrumentos de descrición que permiten a súa valoración e recuperación. O cadro de clasificación deste arquivo e o seu inventario somero complétanse cunha exhaustiva descrición, a nivel de expediente en moitas series, a disposición de calquera interesado no propio concello e no Arquivo da Deputación Provincial de Pontevedra, nunha base de datos formada por 21.216 rexistros diferentes.
|